BitTorrent estreará unha tenda de vídeos

BitTorrent estreará unha tenda de vídeos dende a que se poderán descargar películas de estudios como a Paramount, Lionsgate ou a 20^th Century Fox, así como programas de televisión da MTV, de xeito que competirían con servizos semellantes de Apple (iTunes), Amazon (Unbox) ou Microsoft (Xbox Live Video Marketplace).
A principal vantaxe desta nova tenda é que empregará tecnoloxía P2P para a difusión dos filmes, o que mellorará a transferencia dos grandes ficheiros a través da Rede (algo que xa dá problemas á tenda de Microsoft, pois os usuarios teñen que agardar moitas horas para completar os vídeos mercados ou descargan contidos diferentes ós solicitados por mor de fallos provocados polo exceso de carga dos servidores de descarga).
Deste xeito a rede BitTorrent procura afastarse da súa imaxe de sistema de piratería a través da Internet, e consolídase coma unha opción legal para a aceleración de descargas na Rede.