Borderland 4 fai dubidar sobre os futuros prezos dos videoxogos

Borderlands 4 xa se pode reservar en PlayStation 5 e Xbox Series X|S, e está dispoñible para compra anticipada en PC a través de Steam e da tenda de Epic Games, cun prezo inicial de 69,99 euros en ordenador e 79,99 euros en consola. Ademais, confirmarase a súa chegada á consola Nintendo Switch 2 máis adiante en 2025.
Este anuncio resulta tranquilizador para moitos consumidores estadounidenses, que temían que os comentarios de Randy Pitchford, director xeral de Gearbox, insinuando que o xogo podería custar 80 dólares se traducise nunha suba xeral de prezos, algo que semella que non vai pasar nos EE.UU., onde Borderlands 4 en consola terá un prezo de lanzamento de 69,99 dólares, ou sexa, que dende a perspectiva europea a situación podería parecer tanto preocupante como discriminatoria.
O xogo, que se lanzará oficialmente o 12 de setembro de 2025, promete manter o seu característico estilo looter shooter, cheo de acción, humor e caos. Os xogadores poderán explorar o perigoso planeta oculto Kairos encarnando un dos catro novos Vault Hunters. Quen reserve calquera edición obterá como agasallo o Gilded Glory Pack, que inclúe unha aparencia para o Vault Hunter, un deseño para unha arma e unha pel para o dron ECHO-4, todos de carácter estético e sen impacto na xogabilidade.
A edición estándar de Borderlands 4 inclúe o xogo base e o mencionado paquete de reserva. A edición Deluxe, pola súa banda, incorpora ademais un deseño de arma exclusivo chamado Firehawk’s Fury, o paquete de contido descargable Bounty Pack Bundle con catro novas áreas, cada unha con misións, xefes únicos, novos vehículos personalizables, cosméticos adicionais e tarxetas de recompensa que ofrecen desafíos e loot. A edición Super Deluxe engade aínda máis contido, como o Ornate Order Pack con aparencias exclusivas e o Vault Hunter Pack, que achegará dúas expansións narrativas tras o lanzamento, con novos Vault Hunters xogables, rexións inéditas, máis misións principais e secundarias e cosméticos adicionais.
A edición estándar, como xa comentamos, terá un prezo de 69,99 euros en ordenador e 79,99 euros en consola, mentres que a edición Deluxe custará 99,99 euros en todas as plataformas e a Super Deluxe venderase a 129,99 euros tamén para todas as plataformas, polo que a discutible política de prezos europea só afectaría á versión estándar para consolas.
No que respecta ao contido posterior ao lanzamento, Borderlands 4 recibirá tanto actualizacións de balde como contidos descargables de pagamento. As expansións narrativas incluídas no Vault Hunter Pack ampliarán considerablemente a experiencia de xogo, mentres que os catro Bounty Packs, incluídos nas edicións máis completas, permitirán explorar novas zonas con desafíos específicos, loot único e vehículos personalizados. As tarxetas de recompensa permitirán desbloquear recompensas adicionais ao completar obxectivos mentres se xoga, seguindo unha mecánica xa presente en Borderlands 3.
O 21 de xuño celebrarase o evento Borderlands Fan Fest, onde se amosará xogabilidade en directo de Borderlands 4 na canle oficial da franquía en Twitch. Durante a retransmisión, que comezará ás 21:30, presentarase tamén un novo tráiler da historia e outras novidades. Ao longo do verán iranse coñecendo máis detalles sobre o contido e as funcionalidades deste esperado título.