Buenafuente tira da Internet para promocionar o seu novo programa de televisión

Esta noite LaSexta estrea o novo programa de televisión presentado por Andreu Buenafuente e coa colaboración da modelo Eva González, a actriz Silvia Abril ou o humorista Berto, que destaca especialmente pola campaña promocional que estiveron a realizar durante todo o verán, tanto en televisión como na Rede.
Nun principio o programa xa estreara unha curiosa web en construción, pero tamén se valeu do boca a boca para chamar a atención, subindo a YouTube un vídeo dun predicador, Aaron Guzmán, que tras denunciar distintas maldades que se podían ver nas televisións europeas, criticaba ó anterior programa de Buenafuente denunciando que durante o mesmo se consumían drogas e se incitaba ós nenos en vicios, celebrando que o programa se deixara de emitir.

Pero este vídeo era só o comezo dunha campaña, xa que non tardou en aparecer unha segunda parte na que se advertía da volta de Buenafuente á televisión, acusando ó presentador de satánico, xa que a canle que emitía o magazine era laSexta (6), a hora de emisión as 24 (2+4=6) e o día de comezo de emisión, o 17 (7-1=6) compondo un 666, o número da besta.

O vídeo do predicador superou as 100.000 visitas, pero só foi o primeiro paso para manter a atención á espera do programa, xa que durante as últimas semanas publicaron na Internet distintos vídeos nos que se podía ver a suposta preparación da nova produción de El Terrat, así coma unhas simpáticas probas de selección de colaboradores.
Tivemos así unha das promocións televisivas máis activas na Rede que se puido ver en España, e que se concretará no programa que se estrea esta noite.