Carlos Gómez, investigador do CITIC, recibe este mércores o Premio Nacional de Investigación para Mozos na área TIC
martes, 28 de febreiro do 2023
Carlos
Gómez Rodríguez, investigador do CITIC (Centro de Investigación
TIC da UDC) e profesor da área de Ciencias da Computación e
Intelixencia Artificial da Universidade da Coruña, vai
recibir este mércores 1 de marzo o Premio Nacional de Investigación
para Mozos na área TIC de mans do Ministerio de Ciencia e
Innovación. Carlos Gómez estuda o Procesamento da Linguaxe
Natural para que a comunicación cos computadores sexa máis
efectiva. Amais, coordina a área Innova Humanitas do Campus Innova
da UDC e lidera o único laboratorio europeo que conseguiu superar os
récords en precisión da análise sintáctica desde a popularización
das arquitecturas de aprendizaxe profunda.
En
concreto, recibirá en Madrid o Premio Nacional de Investigación
para Jóvenes María Andresa Casamayor, na área de Matemáticas e
Tecnoloxías da Información e as Comunicacións (TIC) na entrega de
premios á que asistirá o reitor da UDC, Julio Abalde.
O
investigador foi recoñecido “pola orixinalidade e o impacto das
súas achegas ao desenvolvemento de algoritmos que incorporan a
linguaxe natural a contornas dixitais propios da Intelixencia
Artificial”, segundo destaca a nota emitida polo Ministerio.
A
traxectoria investigadora de Carlos Gómez é o Procesamento da
Linguaxe Natural, en particular a análise sintáctica que contribúe
a que os ordenadores poidan traballar coa linguaxe humana, de forma
que se comuniquen coas persoas de forma máis efectiva.
Xunto
con Carlos Gómez, foron recoñecidos outros nove investigadores
novos, nunha convocatoria na que se presentaron 185 candidaturas.
Estes premios son o recoñecemento máis importante de España no
ámbito da investigación científica.
Segundo
destacou a ministra Diana Morant, estes galardóns “poñen en valor
a ciencia que se fai en España grazas ao labor de investigadores e
investigadoras con carreiras excepcionais, que dedican a súa vida a
xerar coñecemento e a trasladalo en aplicacións para a sociedade”.
Os
recoñecementos, dotados con 30.000 euros en cada modalidade, están
dirixidos a investigadores de menos de corenta anos, que estean
desenvolvendo un labor relevante e recoñecido internacionalmente
nunha institución española.