Chega Na fin de xogo, o podcast de AGalega Audio e presentado por Iago Gordillo

Os seareiros dos videoxogos están de celebración. A plataforma AGalega Audio estreou neste arrinque de febreiro Na fin de xogo, programa podcast conducido polo experto Iago Gordillo que fará un percorrido sonoro polos videoxogos máis icónicos da historia. Cada capítulo centrarase nun videoxogo en concreto e afondará no contexto e as reflexións que deixa cada título. O catálogo gamer vai desde clásicos como Silent Hill ou Final Fantasy, pasando por referencias alternativas e independentes das majors como Gris ou Portal, até videoxogos galegos e en galego.
O espazo contará coas testemuñas de profesionais do sector que traballaron en videoxogos premiados como Elden Ring ou Baldur’s Gate 3 como Fernando Moreiras, Ramón Méndez ou Alba Calvo. Ademais, buscaranse as voces de xente referente da cultura galega para que nos conten as súas experiencias con videoxogos.
A estrea de Na fin de xogo agasállanos dous capítulos, dedicados a Super Mario Bros e a Sonic, e cada mércores chegará un novo capítulo a AGalega Audio.
Este podcast é producido por Recuncho Gamer, proxecto audiovisual en galego sobre videoxogos que foi recoñecido con galardóns como os premios Youtubeiras ou os Mil Primaveras da CTNL polo seu traballo de normalización lingüística no eido dos videoxogos.