Chuza publica a súa história número 20.000

A popular web galega de recomendación de novas mediante un sistema de edición non xerárquico (baseado na colaboración dos seus usuarios), Chuza, vén de completar o impresionante número de 20.000 historias publicadas, só 220 días despois de chegar ás 10.000, o que dá unha estimación da intensa actividade que está a vivir este servizo web que estaría próximo ás 38 novas enviadas por día nos seus 530 días de vida.
Chuza conta xa con 1.672 usuarios rexistrados, publicou 42.978 comentarios, serviu para emitir 397.342 votos ás novas publicadas e nas últimas semanas supera as 200.000 visitas mensuais e as 7.000 visitas diarias.
En todo este tempo o servizo de Chuza non permaneceu estático, e así, o seu servizo de recomendación de novas foi incorporando funcionalidades adicionais que van dende o chat coñecido coma o Fedello ata a adaptación para a súa correcta visualización en móbiles pasando por un sistema de mensaxes curtas (Chíos) que lembra a Twitter, e que está a ter bastante éxito entre os usuarios habituais desta plataforma informativa social.