Comeza o proceso de dixitalización de datos en sete rexistros civís galegos

A Consellaría de Presidencia, en colaboración Ministerio de Xustiza, inicia este mes de marzo, segundo vén de anunciar a web da Sociedade da Información, o proceso de informatización dos rexistros civís delegados, adscritos aos xulgados de paz, de todo o país.
Trátase da segunda fase do programa Rexistro civil en liña, desenvolvido no marco do Plan Avanza, que ten por obxecto conectar en liña a tódalas oficinas que o rexistro posúe en cada concello, cunha base de datos central en Madrid.
Esta segunda fase de informatización, levarase a cabo nun proxecto piloto na nosa comunidade, nos concellos de Ames, Bueu, Guitiriz, Nigrán, Sada e Teo, (os seleccionados por un comité de seguimento) para, posteriormente, irse incorporando ao resto dos civís delegados ata cubrir os 270 que hai en todo o país.
Ata o de agora, durante a primeira fase, informatizáronse en Galicia os 45 rexistros civís principais, correspondentes ás sete cidades máis importantes da nosa comunidade e ás 38 vilas cabeceiras de partidos xudiciais atendidas por un xulgado de primeira instancia.
Nesta iniciativa, o Ministerio de Industria dotou de equipamento informático ás oficinas, e a Consellaría ocupouse de instalalos e conectalos á rede corporativa da Xunta así como á aplicación INFOREG4, a residente no Ministerio de Xustiza, onde se almacenan os datos sobre o estado civil de toda a población española.
Esta segunda fase pretende, asemade, levar a cabo a dixitalización de tódalas inscricións de nacemento, matrimonio e defunción dende 1950, que quedaron da primeira fase e na nosa comunidade quedarán almacenadas tanto en galego como en castelán.
Por outra banda, os responsables da iniciativa tamén veñen de anunciar a creación do portla mjusticia.es, unha web onde a cidadanía poderá solicitar os certificados que precise a través do servizo de correo electrónico.