Comeza unha nova edición dos GPUL Labs logo do éxito de participación do ano pasado
xoves, 2 de marzo do 2017
O
Grupo de Programadores e Usuarios de Linux, con centro de operacións
na FIC da Universidade da Coruña, vai recuncar este ano (e logo dos
éxitos de participación de 2016) cos seus
GPUL Labs, un programa de innovadores obradoiros en clave
participativa dirixidos a fomentar o desenvolvemento de software en
código aberto e “facer” comunidade galega de desenvolvedores. O
novo roteiro dos GPUL Labs, que beben das fontes do movemento Maker,
depararán non só aprendizaxe, senón tamén creación tecnolóxica
en si mesma.
A
idea, unha vez máis, é fornecer cada semana unha actividade
práctica enfocada a unha tecnoloxía libre. Na
páxina web dos Labs xa podemos ver confirmados obradoiros sobre
Raspberry Pi (unha introdución), sobre Git e GitLab e, tamén, sobre
JS e React.
Segundo
informa o GPUL, os motivos de recuncar cos Labs teñen que ver,
directamente, coa coa acollida das accións programadas o ano pasado,
o ano de estrea. A edición 2016, sen ir máis lonxe, xuntou máis de
450 asistentes. Houbo charlas e hackathons, e do seu seo
xurdiron até 10 proxectos diferentes. Ademais, contouse con tres
patrocinadores internacionais e até oito empresas colaboradoras.
A
convocatoria para este ano xa está lanzada, segundo reflicte o
propio Grupo de Programadores e Usuarios de Linxu, que lembra que no
caso de querermos participar cunha charla, colaborarmos coa
iniciativa ou patrocinala, xa podemos visitar labs.gpul.org
e mailo o repositorio mediante o que se coordina toda a actividade.
Estas
actividades realízanse ao abeiro do convenio de colaboración entre
as Asociacións de Usuarios de Software Libre e a AMTEGA para a
difusión do software libre en Galicia.