Como facer aplicacións limpas, ao detalle nun novo curso de Vitae Consultores
martes, 11 de febreiro do 2020
Quen
traballe facendo desenvolvementos informáticas saberá o importante
que é traballar en grupo, de xeito participativo e enriquecedor.
Para que isto ocorra e para lograr que a contribución de cada persoa
implicada chegue a bo porto, asegurando o máis óptimo resultado
final do desenvolvemento, fai falta seguir unha serie de pautas de
traballo. Estas pautas teñen o obxectivo de achandar o terreo e
permitir que todas as vertentes do traballo estean despexadas de
obstáculos. Dito doutro xeito: precísase que todo o mundo fale a
mesma linguaxe e que non haxa equívocos. Para botarnos unha man
neste punto, Vitae
Consultores organiza cada pouco o seu Curso Clean Code: Crear e
refacer aplicacións limpas. A actividade formativa, de dez horas
de duración, celebrará a súa edición número 9 na Coruña, o 28 e
o 29 de febreiro, no Hotel Attica 21.
O
curso ten unha orixe que vai máis alá do tecnolóxico e que se
remonta a calquera sector, chanzo industrial ou eido económico: para
acadar as máximas axilidade e eficacia nunha tarefa laboral
concreta, é preciso que todos os elos da cadea sexan ben
comprendidos. Ou sexa, fai falta, entre outros factores, o factor
transparencia.
En
termos xerais, a actividade formativa serviranos para ampliar ao
máximo o noso coñecemento sobre técnicas de código limpo,
recursos que, segundo informa Vitae, “axudan a escribir programas
sinxelos de entender, que achegan valor e que, ademais, poden
evolucionar”.
A
consultora, a propósito dos porqués deste curso, lembra que
“programar é expresar procesos con detalle nunha linguaxe non
ambigua, feita, coma calquera linguaxe, para comunicar verbalmente ou
textualmente”. Vitae engade que “ao escribir cómpre pensar no
lector, sobre todo porque, en moitas ocasións, os lectores imos ser
nós mesmos”. Os obxectivos do obradoiro son, polo tanto, reducir a
cantidade de erros e facilitar o seu achado e distinguir as boas e
malas prácticas de programación.
O
curso está dirixido sobre todo a programadores con experiencia
nalgunha linguaxe orientada a obxectos. O requirimento principal é
sermos usuarios de editores de código, recomendándose o VSCode. A
actividade formativa terá unha duración de 10 horas e cun enfoque
eminentemente práctico.
O
formador será Alberto Basalo, enxeñeiro técnico en Informática
con dúas décadas de experiencia como analista programador, xefe de
proxectos e formador en pequenas e grandes empresas. Basalo é, a día
de hoxe, socio director de AgoraBinaria e consultor asociado a Vitae
Consultores. Entre as empresas e organismos que ten asesorado ou
formado atópanse Tecnocom, Abanca, Softek, GADISA, Inditex, Optare,
Altia, Gradiant ou SIVSA.