Complétase o borrador do Plan de Dixitalización da CRTVG

O director xeral de Comunicación Audiovisual, Manuel José Fernández Iglesias, recibiu hoxe nas instalacións da canle autonómica galega o primeiro borrador do Plan de Dixitalización da CRTVG e as súas sociedades

O membros da Comisión de Dixitalización entregaron hoxe nas instalacións da canle autonómica galega a Manuel José Fernández Iglesias, director xeral de Comunicación Audiovisual, o primeiro borrador do Plan de Dixitalización da CRTVG e as súas sociedades, para organizar o proceso de dixitalización do ente público que se acometerá proximamente, e que terá coma obxectivo instaurar un fluxo de traballo sen cintas, onde os contidos audiovisuais estean dispoñibles dende calquera ordenador de xeito automático e transiten pola rede de comunicacións corporativa. O proceso centrarase nun sistema de xestión de contidos audiovisuais, dotado de ferramentas específicas para cada tarefa.
O Proxecto Básico de Dixitalización da CRTVG, TVG e RG define a tecnoloxía a implantar, o equipamento de hardware e software, as necesidades de espazo e acondicionamento, un plan de formación do persoal e o calendario de actuacións e orzamento. O proceso distribúese en dúas fases (proxecto piloto en 2009 e proxecto executivo en 2010) e conta cun orzamento total de 6 millóns de euros.