Creada a primeira web outlet de pisos de España

Para a gran maioría dos cidadáns de a pé mercar unha vivenda supón un dos desembolsos máis importantes da súa vida; é por isto que para tomar unha decisión (e que esta sexa a máis acertada posible) valóranse moito a ubicación do edificio, o seu estado, o seu deseño… pero sobre todo, o que máis se mira por enriba de todo é o seu prezo.
Se ben é certo que, tal e como afirman os expertos, non é o momento de mercar debido á crise, tamén é verdade que os que necesitan unha vivenda non poden andar a mirar que os prezos baixen ou que a situación se estabilice porque se trata dun ben de primeira necesidade no que non hai que deixar pasar as oportunidades.
Pois ben, para estes cidadáns que non poden agardar para darlle unha vivenda digna ás súas familias, vén de ser creada a primeira web “outlet” de pisos de España: outletdepisos.es, que ofrece descontos de entre o 10 e o 40 por cento sobre o prezo de venda das súas vivendas.
Trátase dunha plataforma na que os bancos e inmobiliarias poderán ofertar os seus produtos e da que, Bancaja e o grupo Mahersol xa figuran entre os seus clientes habituais.
A web, que conta cunha carteira actual de 800 pisos e cun volume patrimonial aproximado de 150 millóns de euros, prevé pechar o 2009 con 5.000 propiedades, e cun volume duns 1.000 millóns en “vivendas low cost”.
Así o veñen de afirmar os seus responsables, os que tamén aseguraron que non faltarán, o vindeiro mes de xuño, ao salón inmobiliario Low Cost que terá lugar en Barcelona.
Os usuarios do portal poden ver tanto o prezo anterior de cada vivenda como o rebaixado, así como acceder directamente a informes de tasación, escrituras e documentos que avalan a natureza do desconto do activo en cuestión.
Asemade, as entidades bancarias e as promotoras informarán dos seus últimos sistemas de venda, como o aluguer con opción a compra e as facilidades de financiación que se ofrecen.
O fundador da web, Alex Melero, afirma que a creación deste portal enmárcase “na profunda transformación do sector inmobiliario que derivará da actual situación económica” e asegura que neste momento “o posible comprador está moi confuso e demora a súa decisión”. O seu obxectivo é, segundo engadiu, “fomentar a compra de vivenda, liderar a adaptación do sector e convertirse no seu referente”.
Pese a que polo de agora o único concello galego que ten presenza nesta páxina web é Viveiro, onde as rebaixas chegan ao 25 por cento, a ben seguro que pronto se engadirán ofertas doutras localidades nas que se ofertarán os mesmos ou mellores descontos.