Creados máis de 27.000 novos dominios .es para mozos e mozas do país

O programa Jóvenes en Red, aprobado en Consello de Ministros co obxectivo de fomentar a presenza dos menores de 30 anos en Internet, vén de acadar un dos seus meirandes logros dende a súa creación: acadar as 27.827 páxinas activas e propiedade de mozos e mozas de toda España.
Estes espazos web, rexistrados de balde baixo o dominio “.es” forman parte dunha iniciativa impulsada pola entidade do Ministerio de Industria, Turismo e Comercio, Red.es, que inclúe capacidade de almacenamento, contas de correo, deseño web, ferramentas de administración e recursos de seguridade.
Os usuarios deste servizo tiveron que escoller primeiro o seu dominio “.es” para logo decidirse entre un dos paquetes que ofrecen dende a web oficial do programa (ata o día 15 de xullo) e finalmente activar o seu propio sitio.
Segundo vén de informar o director xeral de Red.es, Sebastián Muriel, “cada vez temos máis cidadáns que se conectan a Internet, pero agora o obxectivo é que estes usuarios teñan presenza, non só que se conecten, senón que estean”.
Con esta idea de base, o obxectivo desta entidade é agora chegar ao millón de dominios e non falta moito para iso xa que a comezos de xuño a cifra sitúase nos 973.864, 168.500 máis que os rexistrados a finais de 2007 (805.327).
Tendo en conta os datos acadados por Comunidades, Madrid foi a que máis rexistros obtivo grazas ó programa Jóvenes en Red, acadando o 21 por cento do total, seguida de Andalucía cun 19 por cento. Galicia rexistrou o 6 por cento do total de páxinas creadas en España, e tan só foi superada por Cataluña e a Comunidade Valenciana, ademais das xa mencionadas Madrid e Andalucía.
O total de dominios “.es” en Galicia é de 4,36 por cento en relación ó resto de España.