Cultura e Educación inxecta 1 millón de euros para o futuro Centro de Investigación en Industria Intelixente (UDC)
mércores, 23 de novembro do 2022
A
Consellería de Cultura e Educación ratificou o seu apoio ao proceso
de innovación, transformación e excelencia investigadora, docente e
tecnolóxica do Campus Industrial de Ferrol (UDC). Farao
cunha inxección de 1 millón de euros para a construción do novo
Centro de Investigación en Industria Intelixente (CI3). Así o
subliñou este mércores 23 de novembro o conselleiro Román
Rodríguez, que comentou que a infraestrutura “será un polo de
innovación ao servizo de proxectos estratéxicos de enxeñaría,
innovación e deseño”.
O
centro, segundo fixeron saber Rodríguez e o reitor Julio Abalde,
reunirá nun só edificio seis ámbitos de especialización como son
a robótica industrial, materiais, optimización de procesos
industriais, enxeñaría naval e offshore, xestión industrial
e desenvolvemento de produto.
“Este
centro está configurado como unha infraestrutura singular no eido da
enxeñaría industrial e naval”, asegurou o conselleiro Román
Rodríguez, que subliñou que isto suporá crear “un polo de
innovación de fabricación aditiva da industria 4.0”. Deste xeito,
nel poderán aplicarse e poñerse en marcha proxectos estratéxicos e
tractores no eido da enxeñaría, a innovación e o deseño.
Edificio
de 1.455 m² de superficie
Ao
abeiro deste convenio a Consellería de Cultura, Educación, FP e
Universidades asume o custo do programa funcional e da redacción do
proxecto para a construción do Centro de Investigación en Industria
Intelixente, de cuxa materialización se encarga a UDC.
Trátase
dun edificio de 1.455 m² de superficie que se situará na avenida de
Esteiro, na cidade de Ferrol e que dará acubillo a todas as
ferramentas e recursos nun mesmo espazo multidisciplinar á
disposición dos investigadores para dar resposta aos grandes retos
da industria 4.0, ámbito no que o campus conta cunha acreditación
de especialización.
O
CI3 estará centrado nas liñas estratéxicas de investigación en
novos materiais e técnicas de fabricación, modelado, enxeñería
naval e oceánica, fabricación aditiva e materiais avanzados.
O
edificio contempla unha dotación para laboratorios e zonas de
espazos xerais con museo científico, espazos de rent-out e
minilabs e zonas de almacenamento e servizos xerais.
A
sinatura do acordo
Á
sinatura do acordo entre a Consellería e a UDC asistiron Román
Rodríguez, Julio Abalde e máis a vicerreitora do Campus de Ferrol e
Responsabilidade Social, María Jesús Movilla, o vicerreitor de
Economía e Planificación Estratéxica, Domingo Calvo, e a
Subdirectora Xeral de Promoción Científica e Tecnolóxica
Universitaria, Maru Tallón.
Mediante
este acordo, a Xunta aportará 950.000 euros para dar comezo á
creación do novo Centro de Investigación en Industria Intelixente,
Ci3, que a Universidade da Coruña construirá ao lado do Campus de
Ferrol.
En
concreto, trátase dun edificio de nova construción de 14.771 metros
cadrados, con nove niveis divididos en dous sotos, seis andares e un
entresolo situado nunha parcela de 1.455 metros cadrados na avenida
de Esteiro. O reitor explicou que “o proxecto está xa adiantado
pois xa se dispón dun anteproxecto de necesidades que establece que
o edificio contará con espazos xerais, área de laboratorios e áreas
técnicas”.
O
proceso que hoxe se inicia continuará de forma inminente coa
licitación do proxecto. A previsión é que a elaboración do
proxecto leve un ano e que, despois, buscando unha vía de
financiamento coa Xunta se saque a concurso a construción dun
edificio que podería estar realizado a finais do ano 2025.
Para
o reitor, a formalización deste convenio “é un paso moi
importante dentro do proxecto de desenvolvemento do Campus de Ferrol
iniciado en 2016”. “Con este acordo iníciase o proceso de
creación dun novo edificio de investigación ao servizo do sector
produtivo e do desenvolvemento de Ferrol e comarcas”, engadiu
Abalde.