Desvelan os xogos de PS Plus do mes de novembro

Os xogos mensuais de PlayStation Plus para novembro chegan con tres propostas moi diferentes pero igualmente atractivas: Stray, EA Sports WRC 24 e Totally Accurate Battle Simulator. Estes títulos estarán dispoñibles para todos os subscritores do servizo desde o martes 4 de novembro ata o luns 1 de decembro.
A primeira proposta é Stray (para PS4 e PS5), unha aventura en terceira persoa protagonizada por un gato calleiro que debe resolver un antigo misterio para fuxir dunha ciberurbe esquecida. Ambientado en calellas iluminadas con luces de neón e suburbios decadentes, o xogo permite explorar o mundo a través dos ollos do felino e interactuar co entorno dun xeito singular. O estudo francés BlueTwelve Studio, formado por un pequeno equipo que presume de estar composto por “gatos e uns poucos humanos”, é o responsable deste título que se converteu nun fenómeno pola súa atmosfera e orixinalidade.
O segundo gran lanzamento do mes é EA Sports WRC 24, dispoñible para PlayStation 5. Desenvolvido polo equipo de Codemasters, herdeiro da saga Dirt Rally, o xogo ofrece a experiencia oficial do Campionato Mundial de Rally da FIA, con coches, escudarías e pilotos das categorías WRC, WRC2 e Junior WRC da tempada 2024. Inclúe modos como Carreira, Campionato, Contra o reloxo, multixogador multiplataforma e un completo editor de deseños. Un dos principais atractivos é o modo Construtor, que permite crear e pilotar o coche dos soños, así como o modo Momentos, no que se poden revivir episodios históricos e recentes da competición.
Por último, Totally Accurate Battle Simulator (para PS4 e PS5) propón un enfoque máis cómico e surrealista. Neste título, o xogador dirixe exércitos de wobblers vermellos ou azuis procedentes de diferentes épocas, mundos de fantasía e escenarios insólitos. As batallas desenvólvense cun sistema de físicas imprevisible e humorístico, e ademais é posible crear novas unidades co editor integrado ou competir contra outros xogadores en liña.