Dúas universidades galegas no Ranking Web de Universidades 2008

O Laboratorio de Cibermetría do Consello Superior de Investigacións Científicas (CSIC) vén de publicar a segunda edición do Ranking Web de Universidades 2008, que mide a presenza na Rede de institucións universitarias de todo o mundo.
Nesta clasificación (que reúne as 500 primeiras do eido internacional), aparecen 25 universidades españolas e entre elas, a Universidade de Vigo e a Universidade de Santiago de Compostela, que ocupan os postos 452 e 461 respectivamente.
A Universidade da Coruña, pola súa parte, ocupa o posto número 583 do ranking, moi por enriba de entidades académicas da altura da Universitat Oberta de Catalunya ou da Universidade Rey Juan Carlos de Madrid, entre outras.
A Complutense de Madrid é a primeira española da clasificación e ocupa o posto 140 do mundo e o 34 de Europa.
As 25 primeiras posicións están ocupadas por universidades estadounidenses e a primeira europea é a Universidade de Cambridge (Reino Unido), que se atopa no posto 26 do devandito ranking.
O peso das universidades na Rede non se mide, en contra do que poderiamos imaxinar, polo número de visitas recibidas, nin polo seu deseño ou aspecto, senón polo número de citas ou número de ligazóns que recibe cada web en cuestión, é dicir, pola súa visibilidade na Rede.
Na imaxe, a facultade de filoloxía da USC.