El Enigma de la Abadía quere recuperar o espírito de La Abadía del Crimen

xoves, 18 de decembro do 2008 Marcus Fernández

Hai pouco chegou ás tendas o xogo para PC The Abbey polo que pode sorprender que paralelamente o estudo InGnius estea a traballar o xogo El Enigma de la Abadía, que chegará para PC, Xbox 360 e PlayStation 3, e pretende ser unha versión non oficial do libro de Umberto Eco O Nome da Rosa como tamén fixera a finais de 1987 o xogo La Abadía del Crimen, considerado por moitos como un dos mellores títulos desenvolvidos en España (así coma un dos mellores xogos para ordenadores de 8 bits).
O novo título está a desenvolverse empregando un motor gráfico en 3D de nova xeración, e tamén adaptará a mecánica do xogo aos tempos que corren, de xeito que achegará máis liberdade que La Abadía del Crimen á vez que engadirá desafíos secundarios e incluso finais alternativos, o que garantirá moitas horas de xogo e tampouco prescindirá de modo en liña e/ou cooperativo.

O nivel de detalle gráfico do xogo parece estar á altura doutras aventuras gráficas actuais

Polo momento só podemos ver as primeiras imaxes do xogo en desenvolvemento que nos amosan unha calidade gráfica notable, e nos vindeiros días se publicará un vídeo no que poderemos ver como o clásico desenvolvido por Paco Menéndez e Juan Delcán se transforma nun videoxogo actual, co plus de ser unha produción española, o que podería servir de exemplo de que non é preciso ir ao estranxeiro para contar con bos equipos creativos.

PUBLICIDADE