Elixen a Manuel Gago coma o mellor blogueiro da comarca compostelá

O xornal Santiagosiete organizou un concurso para seleccionar os mellores blogs da comarca compostelá, aos que optaron un total de 57 cadernos dixitais, dos que un xurado (composto por Tim Redford, Berto Yáñez, Laura Otón, Iván Puentes, Jesús Bastante, Javi Camino, Renato Landeira, Chelo Suárez, Guille Fernández, Yolanda Castaño e Víctor Neira) elixiu coma mellor blog o Capítulo 0 de Manuel Gago, bitácora da que xa temos falado en diversas ocasións é que está sempre nos primeiros postos nas listaxes de relevancia do chamado Blogomillo. Vemos así coma un referente na Internet galega recibe un recoñecemento merecido aínda que se limite a un ámbito xeográfico reducido (non sorprendería un galardón semellante a nivel autonómico), aínda que nesta primeira convocatoria blogueira de Santiagosiete contou con boa compaña, pois na segunda posición quedou A Regueifa de Noel Feáns, seguido do Ultrasónica de Xavier Valiño.
Agardemos que estes galardóns axuden a espallar o coñecemento dos interesantes blogues elaborados en Compostela por parte dos cidadáns que en moitos casos nin sequera son conscientes da tremenda oferta de contidos locais dispoñibles na Internet, e que iniciativas como esta axudan a difundir.