En la más vil ruina, The Piano e Adiós triunfan no IX Festival Internacional de Animación Animacción

O Festival Internacional de Animación Animacción pechou a súa novena edición coa entrega dos premios aos mellores curtametraxes, nunha edición que reuniu arredor de mil asistentes ao longo de seis días de programación.
O galardón do Público na sección xeral foi para En la más vil ruina, do director Gabriel Molinaro, que explora as vidas de tres mozos (Tomás, Rafa e Mónica) na súa procura dun rumbo vital. Na sección infantil, o público escolleu The Piano, de Avery Kroll, unha historia sobre o vínculo entre un pai e a súa filla arredor da música, transmitido de xeración en xeración.
O Premio do Xurado recaeu en Adiós, de José Prats, distinguido pola súa sensibilidade ao retratar «a evolución e a complexidade da relación entre un pai e o seu fillo».
O tribunal profesional tamén concedeu dúas mencións especiais: na categoría xeral recoñeceu Buffet Paraíso, de Santi Amézqueta e Héctor Zafra, pola súa «magistralidade, plasticidade técnica e potencia» na representación dunha historia ambientada nun bufé cheo de gula; mentres que na categoría infantil destacou Bidouille, de Emi Inohana e Morgane Holsters, pola súa «capacidade de atrapar á audiencia con suspense e humor desde unha situación cotiá».
O Concurso de Cortinillas do festival tivo como gañador a Pedro Terrados.
Ademais das proxeccións a concurso, o programa de Animacción incluíu unha ampla variedade de actividades: pases especiais de The Wanted 18 e The Tower dentro do proxecto Palestina Animado; as obras Flow e Memorias de un caracol; e unha selección do palmarés do festival portugués CINANIMA 2024. O público puido asistir tamén ás charlas dos directores Salvador Simó e Juan Pablo Zaramella.
O xurado desta edición estivo formado polo propio Zaramella, pola docente e artista Elena López González e polo animador e model maker Jorge Rodríguez Gorka.
A directora do festival, Eva Bello, celebrou os resultados desta edición e agradeceu «a implicación do público, dos autores e das institucións que fixeron posible poñer en valor o sector da animación e amosar o potencial dunha nova xeración de creadores».
Animacción está organizado pola asociación Ánimas Anónimas, integrada por directores, produtores e animadores galegos que, ao longo do ano, promoven actividades, proxeccións e iniciativas como Mcguffin, un reto aberto a novos talentos e profesionais da animación.