Estudantes da UVigo crean un proxecto de videoxogo inspirado nunha novela de Pedro Feijoo

Tomando como base un fragmento da novela, Ninguén contará a verdade, de Pedro Feijoo (Premio Xerais de Novela 2023), que narra a historia dunha xornalista que busca desentrañar un caso de corrupción política, o grupo de estudantes ComTecArt, da Facultade de Comunicación e da Escola de Enxeñaría de Telecomunicación da UVigo, idearon un proxecto de aventura gráfica que mestura esa trama de corrupción con elementos de ciencia ficción e que este mércores 29 de outubro presentaron ao escritor vigués.
Estes estudantes estiveron a traballar ao longo dun cuadrimestre no deseño e desenvolvemento da primeira fase dun videoxogo, no marco da súa formación en diferentes materias. Partindo dun fragmento desta novela.
O grupo de once estudantes dos graos en Comunicación Audiovisual e Enxeñaría de Tecnoloxías de Telecomunicación idearon unha proposta de xogo que converte esta trama de corrupción e investigación xornalística “nunha historia sobre insectos xigantes”, coa que propoñen unha “metáfora da corrupción e avaricia”, como explicaron esta xornada. Tomando como punto de partida un fragmento da nova ambientado na redacción dun xornal, idearon un xogo no que a protagonista do libro “tería que facer unha investigación por todos os pisos do edificio”, na que remataría descubrindo a presenza duns “insectos que están infectando ás persoas e converténdoas á súa causa”, de tal xeito que segundo “avanza a corrupción” vanse convertendo en “insectos humanoides”.
Esta foi a proposta que coñecía nesta xornada Pedro Feijoo, quen recoñecía sentirse “moi ilusionado” con este proxecto do grupo de innovación docente ComTecArt. “Non me pode facer máis ilusión, a verdade, porque sempre escribo coa vontade de comunicar, de chegar a alguén no outro lado, de que se estableza un diálogo e que neste caso sirva para que se inventen un videoxogo paréceme xa pechar o círculo”, salientaba este músico e escritor, quen se recoñeceu “asombrado” coa idea que lle trasladou o alumnado. “
Encamiñado a achegar o alumnado aos procesos de traballo na industria do videoxogo, trátase da novena edición dunha iniciativa promovida polos docentes Beatriz Legerén, Antonio Pena, Enrique Costa e Luis Fernández, na que estudantes das dúas titulacións traballan conxuntamente no deseño dun videoxogo do que deberán presentar un primeiro nivel ou demo ao remate do cuadrimestre. A principal novidade desta edición será a integración da Intelixencia Artificial nesta demo, de tal xeito que esta permita ao xogador ou xogadora recorrer a un modelo de linguaxe masivo co propósito de obter información coa que seguir avanzando no xogo.
Esta proposta será desenvolvida por Adriana Pazos e Eva Deibe, alumnas da materia Programación de sistemas intelixentes, do Grao en Enxeñaría de Tecnoloxías de Telecomunicación. “A nosa idea é que, cando un xogador estea atascado, poida preguntarlle a un chatbot”, explican dunha iniciativa que se incorpora a este proxecto “un pouco como experimento”, que levaría a trasladar á plataforma seleccionada información “do contexto do xogo e da situación do xogador”, co propósito de comprobar se podería darlle unha resposta que lle axudase a seguir avanzando no xogo.
Asemade, o alumnado de Comunicación Audiovisual deberá realizar unha proposta de deseño do xogo completo e o grupo en conxunto traballará en dous equipos para converter en realidade o seu primeiro nivel. Nesa idea de “simular como se traballa na industria do videoxogo”, as e os participantes divídense nesta edición nun equipo encargado do “deseño do xogo e da súa programación” e outro encargado “de toda a parte de documentación, apoio, deseño de personaxes...”, explica Legerén.