Falece o creador do código Konami

Unha triste nova para os amantes dos videoxogos é o pasamento esta semana de Kazuhisa Hashimoto, un desenvolvedor de videoxogos xaponés a quen se atribúe a creación do código Konami, unha secuencia de movementos e pulsacións que había que realizar para activar trucos en certos xogos ou para desbloquear ovos de Pascua.
Hashimoto teríase inspirado no Xevious (título que agochaba varios segredos) e creou a célebre secuencia popularizada nos xogos de Konami (arriba, arriba, abaixo, abaixo, esquerda, dereita, esquerda dereita, B, A) como un xeito para activar trucos para a conversión de Gradius para consolas domésticas, xa que o xogo resultáballe demasiado difícil. Curiosamente esta funcionalidade quedou no xogo final, aínda que sería co xogo Contra (Gryzor en Europa) cando se popularizaría o código Konami.
Dentro de Konami converteuse en toda unha tradición incluír ese truco nos seus xogos, pero co tempo houbo moitas outras compañías que fixeron o mesmo nos seus títulos a xeito de homenaxe, para poder así desbloquear personaxes, recibir algunhas vida extra ou, simplemente, desvelar unha mensaxe misteriosa dos creadores do xogo.