Fortnite integrará xogos creados con Unity

Unity e Epic Games anunciaron hoxe un acordo estratéxico para facilitar que os xogos creados con Unity poidan publicarse directamente en Fortnite, un dos maiores ecosistemas de videoxogos do mundo, con máis de cincocentos millóns de contas rexistradas. A iniciativa ofrecerá novas oportunidades tanto para os xogadores como para os desenvolvedores, que poderán integrarse na Economía de creadores de Fortnite e ampliar así o alcance dos seus proxectos nun contorno global.
O anuncio produciuse durante Unite, a conferencia anual de desenvolvedores de Unity, onde tamén se avanzou que a compañía incorporará soporte para Unreal Engine na súa plataforma de comercio multiplataforma. Esta integración permitirá aos creadores que empregan Unreal xestionar de forma unificada os seus catálogos dixitais, provedores de pagamento e tendas web en PC, móbil e web, ademais de establecer prezos, promocións e operacións en directo. O soporte para Unreal Engine chegará a comezos do vindeiro ano.
No comunicado, o presidente e conselleiro delegado de Unity, Matt Bromberg, subliñou que «estamos encantados de asociarnos con Epic Games para crear máis oportunidades para os desenvolvedores de xogos de todo o mundo». Engadiu que «a elección e os sistemas abertos xeran crecemento para todos no ecosistema do videoxogo».
Pola súa banda, o fundador e director xeral de Epic Games, Tim Sweeney, afirmou que «igual que nos primeiros días da web, cremos que as empresas necesitan traballar xuntas para construír o metaverso aberto dun xeito interoperable e xusto» e destacou que «traballando ao lado de Unity estamos a axudar os desenvolvedores a crear xogos divertidos, chegar a audiencias máis amplas e atopar éxito».