GZnación muda de deseño

No verán de 2007 a publicación GZnación estreou director e deseño web (obra de Abertal), e tras todo este tempo non foron poucos os cambios que viviu este medio electrónico, polo que decidiron que se reflectisen na aparencia da súa presenza en liña, e así estrean unha nova imaxe, mantendo a personalidade informativa que os identifica.
A nova web de GZnación conta cun deseño máis moderno e limpo, novos contidos e unha maior estruturación das novas tanto na portada como nas diferentes seccións, facilitando o acceso ao xornal dun xeito ordenado que pretenden que sexa máis eficaz.
Estes cambios aínda non son definitivos, e nos vindeiros días iranse vendo máis modificacións, nun proceso de transformación no que se terán en consideración as suxestións dos lectores para facer máis funcional e atractiva a web que aspira a ser un punto de encontro para os galegos, onde poder debater e opinar.