Gabón non permitirá que o futuro Mega estea nun dos seus dominios de Internet

Blaise Louembe anunciou que cancelarán o dominio me.ga

En xaneiro Kim Dotcom ten previsto revivir Megaupload a través dun novo proxecto chamado polo momento Mega, e que, para fuxir da dependencia da lexislación norteamericana á que están sometidos outros dominios de Internet como o .com, decidiu que podería hospedar baixo o dominio gabonés me.ga, o que tivo como consecuencia o anuncio do ministro de Comunicacións do país, Blaise Louembe de que suspenderán o rexistro de tal páxina web para “protexer os dereitos de propiedade intelectual” e “loitar efectivamente contra a ciberdelincuencia”.

Kim Dotcom criticou a medida preventiva das autoridades gabonesas

Esta reacción está a resultar bastante polémica, pois por unha banda, se o servizo é un simple almacenamento en liña non incumpriría ningunha lei (tal e como critica Dotcom a través de Twitter), e por outra, nin sequera está operativo, o que supón un auténtico atropelo e algúns xa ven como un freo por parte das autoridades de Gabón á innovación, xa que dificilmente alguén poderá apostar por empregar tan sufixo na Internet ante a posibilidade de que o goberno do país poida cancelar un dominio de xeito tan arbitrario.
Pero este pao na roda de Mega non supón a fin do proxecto, e Kim Dotcom apresurouse a anunciar que teñen “un dominio alternativa” engadindo que o acontecido “demostra a caza de bruxas de mala fe na que está involucrada o Goberno dos EE.UU.”.