Galicia está preparada para a transición á TDT

O Grupo de Traballo para o desenvolvemento da TDT en Galicia, promovido pola Secretaría Xeral de Comunicación a través da Dirección Xeral de Comunicación Audiovisual, reuniuse esta mañá en Santiago de Compostela para debater sobre o plan de cese de emisións da televisión analóxica concluíndo que todo está preparado para a transición á televisión dixital.
O devandito plan persegue a elaboración dun marco de actuación para o cese coordinado das emisións de televisión analóxica, garantindo a menor incidencia posible nos cidadáns, para o que se definiron 6 proxectos de transición vinculados ós grandes centros de Retegal en Galicia sitos en Ares, Domaio, Meda, Ourense Leste, Páramo e Santiago-Pedroso.
Os primeiros proxectos en rematar serán os de Santiago e Ourense Leste no primeiro semestre do 2009, sendo o último o de Páramo (Lugo) en abril de 2010, de xeito que a nosa comunidade autónoma cumpriría cos prazos marcados polo Ministerio de Industria para o apagón analóxico.
Cada un dos proxectos deberá dotar ás súas áreas de influencia dunha cobertura de TDT que sexa, como mínimo, igual á que había coa televisión analóxica, para o que hai que incrementar a dotación en emisores e microemisores.
Para pór a proba a capacidade técnica dos proxectos de transición tamén se está a desenvolver un proxecto piloto na Fonsagrada, co que se pretende adiantar o apagón analóxico a finais de marzo de 2008.