Gamerswalk mostra ante Francisco Conde as súas capacidades para atraer seareiros dos eSports

A semana pasada as dependencias da firma TIC GamersWalk, con sede en Oleiros, acolleron a visita do conselleiro de Economía, Emprego e Industria, Francisco Conde, quen puido coñecer de man o potencial de medre da firma centrada en servizos avanzados de deportes en liña. Durante a súa estadía en Gamerswalk, Conde salientou “a necesidade de apoiar ás novas empresas que se basean nas novas tecnoloxías e a innovación, xa que conformarán o tecido industrial do futuro”.
Asemade, tivo oportunidade de esculcar nos detalles da plataforma de streaming habilitada por Gamerswalk (unha innovadora plataforma-comunidade centrada nos eSports e que conecta directamente aos usuarios cos seus streamers e os seus eventos deportivo-tecnolóxicos favoritos) e de coñecer algúns dos principais logros da firma galega (fitos entre os que se contan os premios Empresario Novo e Emprendedor Novo na VII edición dos galardóns organizados pola Asociación de Empresarios Novos de Galicia, AJE Galicia).
Conde enxalzou o traballo de startups como Gamerswalk, facendo fincapé nun dos grandes obxectivos do actual Goberno galego: “Abrir camiño ao talento e ás novas ideas”.
Gamerswalk, como sinalamos hai agora un ano, é unha das nosas empresas do sector TIC de meirande proxección. Coa súa plataforma, en só catro meses de actividade, foi quen de ir alén dos 50.000 usuarios, un fito sen precedentes no mercado español. Ademais, o ritmo de medre da súa comunidade é de aproximadamente medio milleiro de membros diarios.