Google entra no nanoblogging coa compra de Jaiku

Paralelamente ós blogs, o fenómeno do nanoblogging, conformado por plataformas coma Twitter, que permiten a difusión de mensaxes de lonxitude limitada (normalmente a uns 140 caracteres), podería comezar a ter forza, ou así se pode interpretar ó coñecer que Google vén de mercar Jaiku, unha compañía que desenvolveu un clon de Twitter que ía un pouco máis aló tecnoloxicamente.
Dende Google aseguran que os usuarios actuais de Jaiku poderán seguir a utilizar o servizo que lles permite contar ós seus amigos o que están a facer en cada momento (e que funciona tanto dende o ordenador coma dende o móbil), xa que a empresa de Mountain View o que pretende é aproveitar a súa tecnoloxía para integrala nos seus servizos actuais (ou nalgún novo que poida xurdir).
Parece que a superioridade tecnolóxica de Jaiku con respecto a Twitter levou a Google a facerse con esta plataforma de menos popularidade, pois Jaiku ten unha mellor integración con outros servizos sociais (coma Del.icio.us, Flickr ou YouTube) e o seu desenvolvemento está baseado en solucións técnicas máis solventes que a empregada por Twitter (Ruby on Rails).