Google quere utilizar por defecto o seu servizo de suxestión de buscas

Google Suggest en acción na súa versión en inglés

A web principal de Google resístese á incorporación de novidades en virtude da súa simplicidade, pero nestes momentos dende o buscador están a sacar dos seus laboratorios o servizo de suxestións de busca para incorporalo na web principal, o que facilita a vida dos usuarios á hora de teclear as súas buscas.
Deste xeito, cando comezamos a escribir unha busca no formulario de Google a propia web irá presentando en pantalla distintas opcións que nos permite teclear máis rápido (pois funcionan como atallos), evitar os erros tipográficos (xa que presenta as palabras finais completas) e axudando a formular as consultas (pois o sistema suxire posibles buscas coas palabras introducidas).
Esta novidade leva en probas dende 2004, e actualmente xa se aplica na barra de busca do Firefox, en terminais coma o iPhone ou as BlackBerry e en outros servizos de Google, aínda que a súa implantación é desigual xeograficamente (polo momento parece que non chegou ás versións en español e galego).