Hackeando o patriarcado celebra este 18 a terceira edición do seu obradoiro de traballo
martes, 9 de novembro do 2021
A
Cátedra de Feminismos 4.0,
impulsada pola Deputación e a Universidade de Vigo, vai celebrar
este 18 de novembro a terceira edición do obradoiro Sociedade
dixital e xénero. Hackeando o patriarcado. O obxectivo será
“manter activo un espazo de reflexión colectiva ao redor do
denominado patriarcado dixital", sinalan as dúas institucións,
que lembran que este ano o lema é unha chamada de atención directa
para que as tecnoloxías sexan concibidas, desenvolvidas e postas en
marcha cos máis esixentes criterios de igualdade, mesmo as máis
disruptivas. O
lema é Intelixencia artificial feminista fronte aos algoritmos
machistas.
Seguindo
este fío temático, o workshop do 18 de novembro pretende
“cuestionar o papel que están a desempeñar as tecnoloxías na
lexitimación das fendas e nesgos de xénero, así como atender a
información relevante proporcionada polo ecofeminismo ou
tecnofeminismo”.
Programa
e inscrición
A
cita virá con formato semipresencial. A apertura do acto será ás
10 h e contará coa participación de Carmela Silva, presidenta da
Deputación, e Manuel Joaquín Reigosa, reitor da Universidade de
Vigo. A continuación desenvolveranse diversas intervencións e mesas
redondas nas que participarán mulleres referentes no eido da
intelixencia artificial, aprendizaxe automática e visión
artificial.
Entre
elas, estarán Karina Gibert, directora do centro de investigación
Intelligent Data Science and Artificisl Intelligence (IDEAI- UPC);
Lorena Fernández, directora de comunicación dixital da Universidade
de Deusto e membro do grupo experto da Comisión Europea Gendered
Innovations; Nerea Luis, enxeñeira en Intelixencia Artificial en
Singular e unha das 100 mulleres líderes en España; Ona de
Donestech, activista dos dereitos humanos en Internet; e Paola Pozzi,
adestradora e capacitadora profesional certificada por ASESCO.
Na
sesión da tarde, realizaranse un wikigap, impartido
por Adrián Estévez, editor da Galipedia e socio de Wikimedia España
e Portugal, que ensinará como lograr “unha Wikipedia comprometida
coa igualdade, mediante a visibilización do traballo das mulleres”.
Para
as persoas interesadas en asistir de xeito presencial, deberán
desprazarse ata a Escola de Enxeñaría de Telecomunicación da
Universidade de Vigo, situada no Campus Lagoas-Marcosende. Neste
caso, deberán confirmar previamente asistencia. As persoas que
asistan virtualmente, poderán seguir o seminario vía streaming
na Canle Directo 3 da UVigoTV.
A
Deputación de Pontevedra, xunto coa Universidade de Vigo, teñen
como obxectivo, a través da creación da Cátedra de Feminismos 4.0,
promover a igualdade, a non discriminación e accesibilidade
universal das mulleres no ámbito das actuais sociedades da
información. En concreto, a promoción e o impulso de actividades de
investigación e innovación feminista en todos os ámbitos do
coñecemento, priorizando os estudos relacionados coa dixitalización
actual da sociedade e o ámbito das STEM (siglas en inglés de
Ciencia, Tecnoloxía, Enxeñaría e Matemáticas), onde as mulleres
“están infrarrepresentadas e resulta un espazo cada vez máis
relevante nas sociedades do futuro”.