Head Over Heels estrea versión Deluxe para PC

A tenda de videoxogos Steam está a estrear unha revisión dun dos grandes clásicos para ZX Spectrum, Head Over Heels: Deluxe, que ata o 12 de marzo ten un prezo promocional de 11,09 euros, e vén a ser unha versión do clásico de Jon Ritman (a quen tamén debemos xogos como Batman e Match Day II) incorporando unha nutrida paleta de cores e unha xogabilidade refinada, que se desenvolveu para tirar proveito das posibilidades do ZX Spectrum Next, ordenador que aspira a ser o sucesor do Spectrum, que ten previsto volver a Kickstarter en breve para poder chegar a un público máis amplo.
Coa chegada do xogo a Steam os usuarios de PC tamén poden gozar desta xoia protagonizada por Headus Mouthion (Head) e Footus Underium (Heels) que colaboran para superar numerosos obstáculos e quebracabezas en numerosos escenarios en perspectiva isométrica.
Esta nova versión de Head Over Heels conta con puntos de gardado, 3 niveis de dificultade e velocidade de xogo seleccionable, facéndose moito máis accesible para os xogadores actuais, á vez que tamén inclúe novos inimigos e obxectos e incluso un novo mundo completo, polo que os que gozaron do xogo no pasado teñen unha boa desculpa para darlle unha nova oportunidade.