Helldivers 2 chegará a Xbox Series X|S en agosto

Nos últimos meses afixémonos a ver como Microsoft lanzaba xogos para PlayStation 5 que ata o momento eran exclusivos en consola para Xbox, e finalmente Sony segue a mesma política, e anuncia que Helldivers 2, o shooter cooperativo de Arrowhead Game Studios, chegará a Xbox Series X|S o vindeiro 26 de agosto, estando xa dispoñible en reserva tanto na Edición Estándar como na Edición Super Cidadán. A versión para Xbox incluirá xogo cruzado completo entre plataformas, o que permitirá ampliar a comunidade de xogadores deste título.
O director do xogo, Mikael Eriksson, sinalou que este lanzamento responde á demanda da comunidade: «Sabemos que os xogadores levan tempo pedíndoo e estamos emocionados por traer máis Helldivers ao noso universo». O estudio asegura que ten preparados novos contidos para os vindeiros meses e que a chegada de máis xogadores permitirá ampliar o universo narrativo do xogo.
Ambientado no ano 2184, Helldivers 2 sitúa os xogadores no medio da Guerra Galáctica, un conflito en tempo real no que deberán cooperar para liberar planetas e expandir os valores de Super Earth, loitando contra tres faccións inimigas: os Terminids (insectos xigantes), os Automatons (robots de combate) e os Illuminate (alieníxenas tecnolóxicos e telepáticos).
O xogo destaca pola súa acción frenética en terceira persoa, o uso de armas personalizables e as devastadoras stratagems, así como pola posibilidade de xogar en escuadróns de ata catro soldados.