Inaugúrase en Fonseca unha mostra que amosa a historia informática da Universidade de Santiago
luns, 22 de maio do 2017
O
Colexio
Fonseca da Universidade de Santiago acolle dende hoxe a mostra A
historia da informática na USC,
impulsada polo propia
USC coas importantes achegas do
Centro de Supercomputación de Galicia (CESGA) e o
Colexio Profesional de Enxeñaría en Informática de Galicia
(CPEIG). A exhibición abrangue aparellos como unha
máquina perforadora, un Mac
LC ou un
Toshiba Portátil, todos
eles de especial relevancia para o desenvolvemento de importantes
fitos históricos da USC.
Foi
inaugurada polo reitor Juan
Viaño, quen
fixo un percorrido polo significado destes e outros trebellos.
O
obxectivo da exposición, comisariada polo
profesor José Ángel Docobo, é
“guiar o espectador pola historia da informática na USC, que
arranca no
ano 1969 cando o reitor García Carrido decide impulsar un centro de
cálculo propio grazas á colaboración da Fundación Barrié de la
Maza”. Segundo
engadiu Viaño,
“a
devandita
foi unha decisión que marcaría o inicio da modernización
tecnolóxica na universidade”. Precisamente,
engadiu, a constitución
do Centro de Cálculo Barrié de la Maza é “unha das claves da
mostra”, como tamén o é o Proxecto Telegal, “que levou a
informática ás ensinanzas primaria e secundaria de Galicia”.
Ademais,
exponse o primeiro computador analóxico que tivo a USC e mediante
paneis didácticos coñécense as partes básicas e características
dun computador
e a evolución da informática dende os anos setenta até
os nosos días,
a través dun compendio de aparellos dos 80 e 90 e dos distintos
soportes de almacenamento de datos. Inclúese tamén un apartado
dedicado ás aplicacións actuais da computación en distintas liñas
de investigación que se están a desenvolver na USC.
A
mostra poderá
visitarse durante todo este ano de 12.00 a 20.00 horas de luns a
venres e ata as 15 horas os sábados. Os centros educativos e outros
colectivos interesados en realizar unha visita guiada poden poñerse
en contacto co profesor Docobo Durántez no enderezo
joseangel.docobo@usc.es.