Indiana Jones y el Gran Círculo chega a Nintendo Switch 2

Durante a noite inaugural da gamescom o pasado agosto deuse a coñecer que Indiana Jones y el Gran Círculo chegaría a Nintendo Switch 2 en 2026, converténdose no primeiro xogo dos estudios de Xbox para Switch 2, e finalmente a espera rematou, polo que por fin podemos facernos co agardado xogo por un prezo oficial de 69,99 euros.
Deste xeito, os usuarios da última consola de Nintendo poderán vestir virtualmente o sombreiro e a cazadora de coiro do afamado aventureiro cinematográfico nunha historia ambientada entre Indiana Jones en busca da Arca Perdida e Indiana Jones e a Última Cruzada.
O xogo convida a explorar fascinantes paraxes de todo o mundo, desvelar segredos caídos nas tebras da historia e sacar partido do enxeño, o látego e os puños de Indiana Jones para sobrevivir en situacións inesquecibles.
A nova versión do xogo incorpora a función de rato e os controis de movemento da Switch 2, polo que pode achegar unha experiencia aínda máis inmersiva, aínda que a meirande parte dos xogadores apreciará especialmente a posibilidade de poder gozar deste título en mobilidade. Así, un traxecto en transporte público pode converterse nunha oportunidade para atopar artefactos e explorar o enigma do Gran Círculo.