Indiegogo tira a toalla coa ZX Vega+

O proxecto de micromecenado para facer posible a consola Sinclair ZX Spectrum Vega+, que permitiría gozar de xeito portátil a títulos de ZX Spectrum, tiña marcado como obxectivo o mes de setembro do ano 2016, e tras acumular numerosos adiamentos e pór data en moitas ocasións ao inicio dos envíos aos seus mecenas, dos que conseguiron 512.790 libras esterlinas, remataron coa paciencia dos responsables de Indiegogo, plataforma de crowdfunding que estaba a recibir moitas reclamacións dos usuarios ante a negativa de Retro Computers Ltd (RCL) de devolver os cartos aos mecenas fartos de agardar.
A primeiros de mes Indiegogo lanzou un ultimatum a RCL, esixíndolles que demostrasen que o proxecto continuaba a ser viable achegando unha unidade da ZX Spectrum Vega+, pedindo tamén que devolvesen inmediatamente os cartos reclamados por clientes insatisfeitos e que facilitasen datos de contacto a representantes de Sky (compañía á que culparon dos últimos adiamentos, ao parecer, inxustificadamente).
Ao non atender as demandas dende RCL, dende Indiegogo dan por fracasado o proxecto, e inician accións para reclamar os cartos recadados, o que pode levar o seu tempo, aínda que é posible que nos vindeiros meses dende RCL consigan cumprir coas súas obrigas e entreguen as consolas aos mecenas, pois a páxina web continuará activa para que dende RCL poidan manter a comunicación cos usuarios.
Dende Indiegogo desexan que RCL cumpra coas súas últimas promesas, que consistían en enviar as consolas Vega+ aos mecenas a partires do día 15 deste mes, algo que resulta moi pouco crible, pois xa prometeran iniciar os envíos na primeira metade do mes de maio (e levan 2 anos asegurando que en poucas semanas comezan os envíos).