Innovatia 8.3 volverá premiar empresas tecnolóxicas creadas por mulleres

A cuarta edición do concurso Innovatia 8.3, ceratme de premios para as empresas creadas co apoio das universidades ou organismos públicos de investigación (OPIs) e lideradas por mulleres, admite propostas ata o 5 de setembro. Así o ven de confirmar a Universidade de Santiago, impulsora desta iniciativa, engadindo que o seu obxectivo é “distinguir proxectos de emprendedoras con carácter innovador, ademais de promover a igualdade de oportunidades entre mulleres e homes no ámbito universitario e tecnolóxico”.
Os premios concederanse por proxectos empresariais, con independencia do número de persoas participantes nos mesmos. Así, outórgase un premio ao mellor proxecto empresarial de base tecnolóxica, dotado con 10.000 euros; e un premio ao mellor proxecto empresarial startup, que conta con 7.000 euros. As candidaturas deberán presentarse a través dun formulario de inscrición específico.
Neste certame impulsado pola USC e o Instituto das Mulleres, poderán participar empresas con presenza maioría de mulleres no consello de dirección ou consello de administración e que fosen creadas co apoio dalgunha das universidades españolas ou dos OPIs. A valoración e puntuación das empresas presentadas ás dúas categorías corresponderá a un comité avaliador composto por persoal experto.