Intel presenta un xogo para adestrar ós futuros xerentes de informática das empresas

luns, 28 de maio do 2007 Fernando Sarasketa

Para os negocios tamén fai falta adestramento, e non só no que se refire á paciencia (santa) coa que temos que aturar unha boa parte das ordes dos nosos xefes. É dicir: que en moitas ocasións non chega con ter unha boa formación e con saber moito de informática para que conten contigo –por exemplo- nunha firma como xerente de informática. Para Intel, é fundamental ter boa man para controlar orzamentos, loitar contra ataques en liña de seguridade e garantir que os computadores dos empregados van ter os programas máis axeitados para a empresa. A xuízo da multinacional, isto perfecciónase coa experiencia, e, a falta doutras oportunidades laborais previas, nada mellor que tirar proveito do virtual, concretamente do xogo IT Manager Game 2.0 (ITMG2), que vai dirixido sobre todo a estudantes de informática e a profesionais deste eido coa arela de actualizar as súas habilidades.
No xogo (no que por certo tamén se nos ensinan os métodos máis axeitados para levar a cabo un despido… como se houbese algún método axeitado, vaia), poñémonos na pel dun xerente de IT ó que se lle encomenda o seguinte gran obxectivo: conseguir que a empresa virtual na que traballa sexa máis rendible e eficaz. Estamos polo tanto perante un simulador que, como todos os xogos, que foron e serán no mercado dos videoxogos, vai de menos a máis. Ou sexa, que iremos pasando (como quen di) de regar as plantas do xefe a procurar solucións contra un ataque hacker dixirido a facerse coa información dos nosos ordenadores. O produto, para que saibamos ben cara a onde dirixir os nosos esforzos (suponse que cara a arriba, claro) achéganos unha listaxe en tempo real cos mellor clasificados do xogo onde figuran as compañías virtuais mellor engraxadas.

PUBLICIDADE