Internet aínda non desbanca á televisión como medio para seguir os Xogos

Segundo vén de anunciar o Wall Street Journal, os espectadores seguen preferindo a televisión como medio de comunicación para seguir os Xogos Olímpicos de Pequín pois os últimos datos de audiencia así o demostran.
O xornal norteamericano afirma que as cifras de espectadores por Internet non son nada favorables e aínda que non son “desoladoras” non se corresponden, dende logo, coas expectativas iniciais que se tiñan respecto deste medio.
O medio estadounidense apuntou como exemplo que tan só un 0,2 por cento do total de espectadores están a seguir os Xogos exclusivamente a través das emisións en liña da NBC e que tan só preto do 10 por cento do total usan os medios en liña para ver as competicións, fronte á gran maioría (o 90 por cento dos espectadores) que optan polo medio habitual: a televisión.
A conclusión principal que se desprende deste estudo é que a cobertura en liña só se emprega como fonte secundaria de información e que, sempre que se pode, os espectadores optan pola televisión como medio principal.
Os datos, aínda que se refiren aos espectadores estadounidenses, poden ser extrapolados ao noso pais xa que, tendo en conta que a penetración de Internet é menor cá norteamericana, as cifras poderían ser moi similares ou incluso situarse por debaixo.