Investigadores da USC deseñan un procedemento para estudar inscricións e gravados en 3D
luns, 4 de xaneiro do 2016
Un grupo de
investigadoras/es da área de Prehistoria e Arqueoloxía da
Universidade de Santiago veñen
de desenvolver unha nova metodoloxía para o procesado o informático
de imaxes e o estudo pormenorizado de petróglifos, inscricións ou
gravados megalíticos en 3D. A tecnoloxía creada, que se
fundamenta sobre software libre, está a ser probada en petróglifos
de Campo Lameiro e máis en inscricións do Museo do Pobo Galego.
Miguel Carrero Pazos, Alia Vázquez Martínez e Benito Vilas Estévez
son os impulsores da iniciativa, de nome AsTrend, cuxo obxectivo é
“axudar a obter un rexistro máis exacto dos gravados”.
O
proceso, reflicte a Universidade de Santiago, parte do traballo cun
escáner 3D ou cunha metodoloxía de baixo custe denominada
fotogrametría de obxecto próximo e “baséase na creación dun
modelo tridimensional a partir de series de fotografías que se poden
tomar con cámaras convencionais”.
Con respecto a
metodoloxías previas e análogas, o traballo desenvolvido polo grupo
de especialistas da USC achega o “extra” de pór en xogo melloras
importantes no proceso de “posprocesado”, salientando as
concavidades e convexidades do modelo 3D para ler mellor os gravados.
Segundo Miguel Carrero “até o de agora existían achegas que, de
diferente forma, xogaban con sombras artificiais para poder ver
mellor os motivos”. Coa metodoloxía que presenta o equipo de
Carrero tírase partido de das visualizacións da tecnoloxía LiDAR
para exaltar detalles. O froito de todo isto, salientan, é “un
rexistro dos gravados moito máis exacto”.
O proxecto do equipo
da USC atópase arestora en vías de publicación e será presentado
no Computer Applications and Quantitative Methods in Archeology, en
2016 en Oslo, congreso internacional sobre novas tecnoloxías
aplicadas á Arqueoloxía.