José María Lasalle e Suso Baleato falarán dos riscos deshumanizadores das TIC nunha xornada do CCG
venres, 21 de febreiro do 2020
- José María Lasalle nunha imaxe recente da RTVE
O
Consello da Cultura da Galega vai abrir novos camiños de reflexión
acerca da revolución tecnolóxica que estamos a vivir, unha
revolución que vai ir a máis, e as súas principais consecuencias
sociais, laborais, empresariais e culturais. Esta reflexión virá
dada polo investigador cántabro José
María Lasalle, que vai participar o vindeiro 27 de febreiro (ás
18.00 horas) no ciclo Pensarmos do CCG, baixo o
seguinte relatorio: É posible dar sentido ás máquinas? Cara a
un humanismo tecnolóxico. A súa intervención
contará co retruque do analista especializado en tecnoloxía
política Suso Baleato. A inscrición está aberta e pódese facer a
través do web da institución.
José
María Lasalle, na súa intervención, porá o foco nos principais
riscos que achega a revolución tecnolóxica en materia de dereitos,
facendo fincapé en como o contexto actual está a destruír herdanza
da Revolución Francesa (da que naceu unha estrutura de dereitos e o
concepto de cidadanía) e da Revolución Industrial (que rematou nun
pacto igualitario entre o capital e o traballo). Segundo avanza, “o
novo contexto das máquinas está acabando con todos os mecanismos
dunha sociedade democrática”, e Internet, que “chegou para ser
unha experiencia de liberdade”, acabou por “converterse nun
modelo de negocio”.
Os
pensadores desta sesión
José
María Lassalle é doutor en Dereito, iniciou a súa traxectoria
profesional como investigador e profesor na Universidade de Cantabria
e na Universidade Carlos III de Madrid. Foi coordinador científico
do Centro de Estudios Hispánicos e Iberoamericanos da Fundación
Carolina e, máis tarde, director desta institución.
En
2004 iniciou a súa actividade política como deputado no Congreso
por Cantabria. Compatibilizou a súa dedicación á política coa
actividade docente na Universidad San Pablo-CEU e na Universidade Rei
Juan Carlos de Madrid. En 2011 foi nomeado secretario de Estado de
Cultura e, en 2016, da Axenda Dixital. En xullo de 2018 abandonou a
política.
É
autor de numerosos ensaios e publicacións académicas sobre
pensamento político e filosofía anglosaxoa, escribe periodicamente
no suplemento Ideas de El País e en La Vanguardia e
colabora en Las mañanas de RNE. Na actualidade é consultor
privado e senior advisor no Observatorio Panhispánico da
London School of Economics, director do Foro de Humanismo Tecnolóxico
de ESADE así como profesor de Teoría do Dereito e Filosofía do
Dereito na Universidade Pontificia de Comillas (ICADE).
Na
outra cadeira de pensar sentarase Suso Baleato. Doutor en Ciencia
Política e enxeñeiro Linux, é investigador asociado da Harvard
University (EE. UU.) e profesor posdoutoral na Universidade de
Santiago de Compostela. Especializado na aplicación de métodos
computacionais para a investigación social, o seu traballo céntrase
na causalidade política e socioeconómica da tecnoloxía dixital.
Baleato Foi o primeiro politólogo español en publicar na
prestixiosa revista Science.