Kim Dotcom demanda 6.800 millóns de dólares pola súa detención ilegal hai 6 anos

Dotcom aproveitou o 6º aniversario da súa detención para casar

Hai 6 anos o peche de Megaupload pillou a todo o mundo por sorpresa, non porque o público non coñecese o servizo e o uso fraudulento que facían moitos dos seus usuarios para vulnerar os dereitos de autor, senón polo feito de que a detención do seu responsable, Kim Dotcom, tiña lugar en Nova Celandia, país no que é residente permanente, en boa medida porque a lexislación local non consideraba delito a piratería. De feito, poucos meses tardaron en declarar ilegal o rexistro do seu domicilio, pero iso non detivo un longo periplo xudicial que aínda non rematou e no que nos EE.UU. piden a súa extradición para poder xulgalo baixo a súa lexislación, o que non están a conseguir, principalmente polos vicios de toda esta actuación promovida polas autoridades norteamericanas.
Sobra dicir que todo este proceso deixou fóra de servizo Megaupload.com e causou un grande quebranto económico para Kim Dotcom, quen mentres loita contra a súa extradición aos EE.UU. vén de iniciar unha demanda contra o goberno neocelandés por danos, xa que as actuacións ilegais na súa contra estragaron o seu negocio, fixéronlle perder a súa reputación e provocáronlle numerosos gastos xurídicos.
Dado que o grupo de empresas de Megaupload de non ter sido pechado en 2012 podería estar hoxe valorado nuns 10.000 millóns de dólares, Dotcom pide a parte proporcional relativa á súa participación na empresa, ou sexa, 6.800 millóns de dólares.
O principal argumento de Kim Dotcom na súa defensa é que a lexislación de Nova Zelandia recolle expresamente que non pode sancionarse criminalmente a un provedor de servizo da Internet, e dado que para a extradición a un país de destino o delito tamén ten que ser tal no país de orixe, non parece que as cousas vaian mudar no futuro, polo que resulta previsible que agora Dotcom esixa un resarcimento, aínda que resulta evidente que as cantidades que demanda son desproporcionadas, máis propias de tribunais estadounidenses que dos xulgados dos antípodas.
Actualmente Kim Dotcom está a preparar a saída ao mercado de Bitcache, unha nova compañía de micropagamentos e tamén aproveitou o 6º aniversario da redada na súa mansión para casar con Elizabeth Donnelly nunha cerimonia privada en Auckland.