La Voz de Galicia renova a súa web co gallo do Día de Galicia

Esta semana parece o momento elixido por boa parte dos medios dixitais para renovar a súa imaxe co gallo do Día do Apóstolo, e igual que GZNación, tanto webs coma Trebellos ou La Voz de Galicia cambiaron as súas webs.
A nova edición de La Voz era algo moi agardado, que amosa así un formato máis amplo, adaptándose ás novas resolucións de pantalla, de xeito que os 800 píxeles de ancho danlle paso a uns 1.024 píxeles que xa son o estándar da web actual, o que lle permite tamén aumentar o tamaño das súas tipografías e incorporar máis contidos multimedia.
A navegación da nova web pretende ser máis intuitiva, aínda que despista ós usuarios que estaban afeitos a unha barra lateral á esquerda da web que agora se ve substituída por unha barra superior de dous niveis como tamén fixeron moitos outros medios dixitais nos últimos meses (polo que esta solución de navegación se está a converter nun estándar de facto).
As edicións locais de La Voz tamén teñen un espazo especial na portada da web, onde tamén aparecen recadros dedicados a galerías fotográficas, vídeos, espazos de participación, blogs, a información meteorolóxica e mesmo o humor, creando un espazo moi completo que pode satisfacer directamente á meirande parte de lectores que non terán así a necesidade de profundizar nas distintas seccións da web (atopando os contidos buscados directamente).
Os cambios na web de La Voz parecen estar vivos, de xeito que algúns contidos que parecían estar emerxendo onte, hoxe están operativos, de xeito que se vai adaptando para cumprir co obxectivo de atender a un importante público que o converten na publicación galega líder tanto na Internet como fóra dela.