Lalín aprobou a política de seguridade da información do Concello

O Concello de Lalín, ao abeiro da súa estratexia para mellorar as medidas da seguridade da información e a blindaxe dixital ante posíbeis ciberataques tanto do Castro Tecnolóxico como do Padroado Cultural, aprobou este mes de xullo a política de seguridade da información do Concello de Lalín, un documento onde se establecen as directrices neste eido.
Ao abeiro desta política consitiuse o Comité de Seguridade da Información, órgano que coordina toda as políticas de seguridade do Concello e que está composto polo alcalde, o secretario xeral, o concelleiro de Novas Tecnoloxías, o departamento de Informática e tamén poden asistir as xefaturas de servizo.
Fontes do Concello indicaron que o Réxime Xeral de Protección de Datos e o Esquema Nacional de Seguridade serán as dúas normas de obrigado cumprimento que máis van impactar no desenvolvemento dixital das entidades do sector público e por iso “dende o Goberno lalinense queremos ser dos primeiros concellos en dar resposta a esta normativa”.
A tenente alcalde, Paz Pérez; o edil de Novas Tecnoloxías, César Reboredo, e o técnico informático Carlos Vence explicaron o proceso xa dado neste ámbito polo Concello e os pasos a seguir de cara a conseguir a certificación do Esquema Nacional de Seguridade prevista no prazo de dous anos, seguindo as pautas marcadas polo Centro Criptolóxico Nacional.
Os obxectivos da política municipal da información son” mellorar a seguridade, fomentar a relación electrónica coa cidadanía e facer fiábel, confiábel e segura toda a actividade municipal”.