Máis de cincocentas obras de Roxelio Groba poderán ser consultadas por Internet

O Arquivo Nacional maila Biblioteca Nacional de Galicia veñen de anunciar que, en breve, van incorporar aos seus fondos un total de 534 composicións da obra do artista galego Roxelio Groba para seren consultados a través de Internet por calquera interesado.
Este autor, un dos “referentes na música culta da nosa comunidade” foi un dos encargados de asinar o convenio de colaboración da Fundación Roxelio Groba coas Consellarías de Cultura e Vivenda, para “impulsar o proceso de dixitalización” das súas obras e “dotar dun local á entidade que el mesmo preside”.
A conselleira de Cultura da Xunta de Galicia, Ánxela Bugallo, maila titular de Vivenda, Teresa Táboas, foron as representantes de cadanseu organismo para a sinatura do devandito convenio, que achegará 56.000 euros para levar a cabo este proceso de “conservación e difusión da nosa cultura”.
O catálogo foi presentado a comezos de ano pola Fundación Roxelio Groba e, en palabras do propio artista, representa “o legado compositivo” onde destacan a ópera Floralba, as cantatas Xacobea e Un pobo sen destino; ou o concerto Confidencias.
O proceso forma parte do Programa de Dixitalización dos Fondos Bibliográficos e Documentais de Galicia e ten como principal obxectivo, “incorporar a cultura galega na sociedade do coñecemento”.
Na imaxe, Teresa Táboa e Roxelio Groba na rolda de prensa de presentación do convenio, obtida da web de El Correo Gallego.