Mark Cuban advirte da ameaza de YouTube para os dereitos de copia

Mark Cuban, o multimillonario norteamericano máis coñecido por ser o dono do equipo de baloncesto Dallas Maverick que polos seus investimentos en empresas tecnolóxicas que lle valeron a súa fortuna, acadou certa repercusión mediática comentar nos pasados días que había que ser parvo para mercar YouTube, pois consideraba que a compañía tiña imposible acadar un retorno do investimento preciso para ter operativo o servizo e estimaba que tería moitos problemas cos posuidores do copyright do material publicado na popular web de vídeos (xa que a meirande parte dos contidos poderían considerarse roubados).
A sinceridade de Cuban foi moi criticada, e tralo anuncio da compra de YouTube por parte de Google, non foron poucos os que insinuaban que o parvo era Cuban, xa que dan por bo todo que fai Google (compañía que, en cambio, coida moito máis a procedencia dos seus contidos en Google Video do que fai YouTube, para evitar problemas de copyright) e o multimillonario decidiu continuar a defensa da súa postura chegando a afirmar que os servizos coma YouTube supoñen unha ameaza para os sistemas DRM (ou de protección contra copias).
Cuban comenta que os contidos de YouTube carecen de proteccións, polo que os usuarios poden descargalos sen límite, e incluso convertelos a outros formatos, creando así material para consumo doméstico que resulta virtualmente de balde para o usuarios, que non se limitaría só o vídeo, xa que incluso se pode extraer o son dos clips para ter música gratuíta.
Podemos asegurar así que YouTube non podería ter problemas legais só coas produtoras cinematográficas, senón que as propias discográficas poderían ver con malos ollos que o seu material se poida achegar de balde da Internet e, de non protexerse contra estas prácticas, estarían a abrir os seus contidos á Rede, perigando os seus modelos de negocio actuais.
Os argumentos de Cuban, pese a que moitos os consideren unha excentricidade, non deixan de ser válidos, e deberían chamar á reflexión sobre os cambios que se están a producir no consumo audiovisual na Internet.