Medio Ambiente fomentará a reciclaxe de material tecnolóxico en 350 centros docentes

A Consellería de Medio Ambiente e Ordenación do Territorio quere fomentar entre a rapazada o espírito de sustentabilidade en relación cos refugallos tecnolóxicos, amais dun coñecemento máis amplo sobre as diferentes maneiras de coidar o noso medio. Con este motivo, puxo en marcha unha nova campaña para sensibilizar á comunidade infantil na necesidade de reciclar os aparellos eléctricos e electrónicos (RAEE), que visitará 350 centros de educación infantil e primaria.
A iniciativa, enmarcada na campaña Oqueseenchufarecíclase, percorrerá 350 centros de ensino de educación infantil e primaria de Galicia. Segundo fixo saber a conselleira Beatriz Mato, para “acadar que as novas xeracións de galegos teñan coñecemento da importancia da reciclaxe dos residuos e, concretamente, dos residuos de aparellos eléctricos e electrónicos”, trasladaráselles “dunha maneira amena e moi didáctica”, a través dos Bolechas, pautas e coñecementos para o correcto tratamentos dos residuos.
Mato engadiu que se trata de que os nenos se convertan, “a través do xogo e de material específico desta campaña adaptado á súa idade”, nos “maiores defensores do planeta”. Ou sexa, que se integren na “Real Orde do Movemento RAEE dos Bolechas”, unha comunidade á que pertencer “supón cumprir un decálogo con comportamentos e actitudes colectivas e individuais que deben poñerse en práctica no fogar e centro de ensino”, explicou.
A conselleira de Medio Ambiente precisou que esta iniciativa está aberta á totalidade da comunidade educativa, non só aos centros que recibirán a visita dos Bolechas, polo que a través dunha plataforma web convocarase un concurso de debuxo aberto á totalidade de centros educativos de Galicia.
No concurso poden participar de xeito colectivo ou individual e entregarase un gran premio de 3.000 euros para as actividades educativas do centro gañador, que se seleccionará entre todos os colexios participantes. Asemade, a titular de Medio Ambiente dixo que ao abeiro desta campaña valorarase o esforzo que realicen os participantes, que polo simple feito de presentar un traballo recibirán como agasallo material de actividades dos Bolechas.