Medra o software libre nas PEME e nas microempresas galegas
xoves, 20 de abril do 2017
A
presenza de software libre nas nosas empresas segue a medrar. As
razóns continúan a ser moitas e variadas, pero case todas elas
teñen relación directa co menor custe, coa total dispoñibilidade,
coa ampla marxe de adaptación e, tamén, cunha calidade crecente nos
produtos e servizos open source (unha boa parte deles
equiparando ou mesmo superando ás opcións privativas). Este
crecemento vén de ser constatado novamente polo observatorio galego
OSIMGA, que no seu informe (en
formato PDF) sobre 2016 (unha análise da presenza de código
aberto nas empresas informáticas e nas PEME galegas en xeral) sinala
que máis do 85% das empresas galegas de máis de 10 traballadores e
a metade das microempresas empregan xa recursos con licenzas libres.
O
informe salienta tamén que as PEME galegas superan a media do Estado
no emprego do software libre, emprazándose no noveno posto da
clasificación española, por diante de comunidades como Madrid,
Catalunya ou Euskadi. Ademais, no caso concreto do sector TIC galego,
o uso dos software libre elévase un 87,2%.
As
aplicacións libres con maior implantación nas empresas galegas
seguen a ser os navegadores de Internet e as aplicacións ofimáticas
libres, cun aumento de 2,1 puntos entre as grandes empresas con sede
na nosa Comunidade e de 3,7 puntos entre as microempresas. Ademais,
un 22,3% destas usan xa sistemas operativos open source,
experimentando esta taxa unha suba de 3,7 puntos, que en palabras do
observatorio OSIMGA, é o maior incremento dos últimos catro anos.
A
investigación tamén reflicte que das firmas TIC galegas que se
adican á venda de software, máis da metade (55,6%) ofertan produtos
de software libre aos seus clientes. Os programas desta Ãndole máis
ofertados son os sistemas de xestión de contidos de portais e
páxinas de web, os sistemas de xestión de bases de datos e os
servidores web. A oferta libre supera á privativa no ámbito dos
xestores de contidos de portais e webs, no ensino a distancia
(eLearning) e no comercio electrónico.