Microsoft presenta unha solución para incluír publicidade dinámica nos videoxogos

Esta semana Microsoft amosou unha nova plataforma publicitaria en New York co gallo do congreso anual Advertising Week ’07, de xeito que os asistentes puideron ver cómo funciona exactamente a publicidade integrada dinamicamente dentro dos videoxogos.
Na presentación veuse coma uns avatares se podían mover por un mundo tridimensional no que en carteis se podían ver trailers de películas coma 300 ou anuncios de automóbiles, acadando unha sensación moi semellante á realidade (onde a publicidade tamén se amosa en vallas) coa vantaxe de que estes anuncios se poden cambiar en calquera momento.
Microsoft conta agora con esta tecnoloxía xa que mercou a empresa que a desenvolve, Massive, en 2006, e nos vindeiros meses podería tirar proveito destas plataformas publicitarias grazas ó éxito do xogo en liña.
Os analistas estiman que na actualidade a publicidade nos xogos move uns 514 millóns de dólares, pero que coa posibilidade dunha xestión dinámica desta canle promocional podería chegarse ata os 675 millóns de dólares en 2012 só nos EE.UU. segundo Park Associates. Non sorprende así que Microsoft estea procurando facerse cunha posición privilexiada nos comezos desta tecnoloxía que podería producir importantes achegas económicas no futuro.