Mininova fai doada a descarga remota da rede BitTorrent

O popular rastrexador de ficheiros na rede BitTorrent, Mininova, presentou unha nova característica que fai moi doada a realización de descargas no ordenador dende calquera lugar. A nova prestación consiste na posibilidade de que os usuarios rexistrados poidan gardar nos seus favoritos os ficheiros que desexen descargar, de xeito que a propia web de Mininova mantén un fluxo RSS con esta relación de ficheiros que, de introducirse nun cliente de BitTorrent, se pode automatizar a súa descarga.
Deste xeito, un usuario pode ter centralizadas as súas descargas no ordenador doméstico, pero poder engadilas dende o portátil, o traballo ou calquera outro sitio con só marcalos na web de Mininova.
Ata o momento, os usuarios de BitTorrent que querían iniciar descargas remotamente debían instalar unha interface web dende a súa aplicación software (o que podía supor un problema de seguridade) o que non era a solución máis áxil nin doada, pero mediante ficheiros RSS é moito máis doado o proceso, e sería de agradecer que outras webs de descargas seguisen os pasos de Mininova para facer a vida máis doada aos seus usuarios.