Movistar Plus+ incorpora novos contidos da BBC

Os clientes de Movistar Plus+ con oferta converxente de televisión poderán acceder desde o 15 de outubro a BBC Player, un novo servizo en exclusiva que incluirá máis de setecentas horas de contidos seleccionados do catálogo de BBC Studios, con series, documentais e programas emblemáticos da produtora británica. Tamén se incorporan as cancles BBC Lifestyle e BBC Earth á oferta de Movistar Plus+.
BBC Player, deseñada especificamente para o público español e dispoñible integramente en castelán, ofrecerá grandes series de ficción, documentais de natureza e producións de entretemento.
Entre os títulos dispoñibles desde o seu lanzamento figuran os documentais de Louis Theroux (Historias de Los Ángeles, Vida al límite ou Louis Theroux Entrevista); producións de historia natural como David Attenborough y el dinosaurio gigante ou Diario de los grandes felinos; e programas como Hoteles increíbles: la vida más allá del vestíbulo, El rival más débil ou Ultimate Wedding Planner. En ficción destaca o drama criminal Padre Brown e as distintas entregas da franquía Paraíso (Crimen en el paraíso, Crimen más allá del paraíso e Regreso al paraíso), cuxos novos episodios se estrearán en primicia a través de BBC Player.

Novas canles

Coincidindo con este lanzamento, a canle BBC Lifestyle (dial 93) desembarca por primeira vez en España a través de Movistar Plus+. A súa programación incluirá espazos sobre fogar, decoración, viaxes e estilos de vida, como DIY SOS, Casas señoriales, Las desventuras de Romesh Ranganathany ou Steve Backshall’s Extreme Mountain Challenge.
Tamén se incorpora a canle BBC Earth (dial 86), con máis de cento vinte horas de contidos dobrados ao español e dedicados á mellor programación documental de BBC Studios. Nela poderanse ver producións como 60 encuentros letales, Expedición Tigre ou Polar Bear: Spy on the Ice.
Ambas canles súmanse ás xa dispoñibles en Movistar Plus+: BBC Series (dial 32), Top Gear (dial 34), BBC History (dial 84) e BBC Food (dial 92), todas incorporadas en xaneiro deste ano.