Nace MercadosMunicipais.es como un punto de encontro para os minoristas
xoves, 12 de febreiro do 2009
A Empresa Nacional MERCASA, dependente da Sociedade Estatal
de Partipacións Industriais (SEPI) e parte integrante da política
agroalimentaria do Goberno español, vén de por en marcha a web MercadosMunicipales.es, que nace
como “un punto de encontro” de
tódolos colectivos, empresas, comerciantes e institucións que actúan en torno
aos mercados municipais minoristas.
O portal desenvolveuse coa colaboración do Ministerio de
Industria, Turismo e Comercio, e está enfocado como un servizo público máis de
MERCASA, a través do Programa de Remodelación e Modernización de Mercados
Municipais.
En España funcionan, na actualidade, uns 1.000 mercados
municipais minoristas e todos eles poden localizarse en MercadosMunicipales.es
de xeito rápido e intuitivo.
Asemade, a aplicación permítelle aos usuarios consultar a
evolución dos prezos dos alimentos frescos ao longo da cadea comercial, coñecer
as recomendacións de consumo máis interesantes en alimentos frescos e de
tempada, ou participar nos foros de debate abertos sobre diferentes temas.
Outras seccións de interese nesta páxina son o apartado
correspondente ás Unidades Alimentarias
da Rede de Mercas, o relativo á Unión
Mundial de Mercados Minoristas, as reportaxes que se van a ir incorporando
progresivamente sobre mercados do mundo, as entrevistas que irán aparecendo
tamén sucesivamente con representantes institucionais ou sectoriais e
profesionais de interese para o colectivo dos mercados minoristas municipais.
