Nace unha plataforma virtual que mira polas linguas en perigo de extinción
xoves, 21 de xuño do 2012
A Galipedia di que falar
dunha lingua en perigo de extinción “é
referirse a aquelas linguas do mundo que son susceptibles de desaparecer por
varias cousas”, entre as que cita a substitución desa lingua por outra, a
desaparición física dos falantes e tamén a desaparición da transmisión
familiar.
Algo semellante a isto é o que lle pasa ao galego
(aínda que queiramos facer que non o vemos), porén tamén a outras moitas
linguas do mundo que por algún dos motivos citados anteriormente, están
chamadas a desaparecer co tempo.
Para evitar que isto suceda vén de crearse en Internet
o Proxecto de linguas en perigo
de extinción, unha plataforma na que podemos atopar e compartir a
información máis completa e actualizada sobre os idiomas en vías de extinción.
En España, as tres linguas que están nesta situación,
e que achega a devandita web, son o aragonés, o asturiano ou bable e a lingua
de signos catalá, sendo a primeira delas a que se atopa unha situación máis
vulnerable.
Documentar as máis de 3.000 linguas que din estar a
punto de desaparecer é un dos obxectivos que se propuxo acadar o equipo de
desenvolvedores da plataforma (que
conta coa colaboración de Google
no seu desenvolvemento), buscando así a forma de “preservar a diversidade, honrar os coñecementos dos nosos maiores e
enriquecer o futuro dos mozos e mozas”, indican.
O que se trata é de que a persoas interesadas en
preservar as linguas en perigo de desaparecer poidan atopar un nexo de unión na
Rede, no que compartir e acceder a investigacións sobre o tema, aportar
suxerencias e establecer colaboracións con outros internautas.
As novas tecnoloxías xogan un papel moi importante
neste proxecto, permitindo, entre outras cousas, a achega de vídeos de alta
calidade cos falantes dun idioma, mostras de linguas en arquivos de audio e
mesmo material que poida favorecer a aprendizaxe de idiomas.
Trátase, en resumo, dun espazo colaborativo aberto a
toda a comunidade internauta, no que tódalas persoas interesadas poden achegar
os seus coñecementos ou aportar o que consideren de utilidade para que ningunha
lingua do mundo desapareza nunca máis.
Vídeo de presentación do proxecto